繼續同史友們介紹我國最新嘅考古發現，以為三星堆只係有黃金面具、青銅鳥腳人像、獨角獸「豬鼻龍」柱狀器？呢個咁神奇嘅考古遺址絕對唔止咁簡單，近日又再次有一樣新嘅文物發掘出土，係首件帶翼神獸！
據了解，考古人員早前就喺8號坑中間嘅位置發現到一個四翼四足神獸文物，當時就暫名為「鏤空立獸器蓋」。從外型上睇，呢個神獸頭部造型係似足老虎，但形像上睇嚟就同以往其他三星堆發現嘅神獸頭部唔同，而且背部仲頂住一個神樹嘅模型。
對於呢個奇特嘅形象，考古團隊又應該點理解呢？專家就推測呢個四翼四足嘅神獸應該就係古蜀人對真實動物嘅抽象再造，所以應該係多種動物嘅混合體，而喺成個中原地區，都從未發現過帶蓋嘅銅尊，絕對係相當罕有嘅一次發現！
原圖嚟自網絡